ئه‌م په‌ڕه‌ چاپ بكه‌

ئەکادیمیاى کوردى کار لەسەر یەکخستنى سەدان وشە و زاراوەى تایبەت بە دەزگاکانى حکومەتى هەرێم دەکات

بڵاوكراوه‌ته‌وه‌ له‌ هه‌واڵ سێ شەممە, 25 تشرینی دووەم 2014 08:40

ئەکادیمیاى کوردى بە سەدان وشە و زاراوە و فۆرمى تایبەت بە دەزگاکانى حکومەتى چووەتەوە، کە وەزارەتى دارایى و چەندین وەزارەتى دیکە لە هەرێمى کوردستان رۆژانە بەکاریان دێنن.
لە نووسراوێکدا بە ژمارە (21) لە 8/1/2013 و هاوپێچەکەى کە وەزارەتى دارایى و ئابوورى ئاراستەى ئەکادیمیاى کوردى کردبوو لە بارەى چەندین فۆرم و وشە و زاراوانەى کە دەزگاکانى حکومەتى هەرێم بەکاریان دێنن و لە زمانى عەرەبییەوە وەرگێڕاوەنەتە سەر زمانى کوردى، هاتووە لێژنەى زاراوە لە ئەکادیمیاى کوردى، بە سوود وەرگرتن لە کارەکانى ئەو لێژنەى پێشتر بۆ ئەم مەبەستە لەلایەن وەزارەتى داراییەوە پێکهاتبوو ، بە هاوکارى کەسانى شارەزا لە بوارى بانک و ژمێریاریى، بە هەموو ئەو فۆرم و وشە و زاراوە و دەستەواژانەدا چووەتەوە کە لە دەزگاکانى ئەو وەزارەتەو و وەزارەتەکانى داد، شارەوانى و گەشتوگوزار، ناوخۆ، ئاوقاف و کاروبارى ئایینى، کشتوکاڵ و ئاودێرى، بازرگانى و پیشەسازى، گواستنەوە بەکاریان دێنن.
هەر لەو نووسراوەدا ئەکادیمیاى کوردى ئامادەیى خۆى بۆ هاوکاریکردنى هەموو وەزارەت و دەزگاکانى حکوومەتى هەرێم دەربڕیوە، بۆ یەکخستنى هەموو ئەو فۆرم و وشە و زاراوانەى لە دەزگاکانى حکوومەت بە کاردێن.
وێنەى ئەو نووسراوە بۆ سەرۆکایەتى هەرێمى کوردستان و سەرۆکایەتى پەرلەمان و سەرۆکایەتى ئەنجومەنى وەزیران و سەرۆکایەتى ئەنجومەنى دادوەریى و هەموو وەزارەتەکان و لێژنەکانى پەرلەمان و پارێزگاکان نێردراوە.

ڕاگەیاندنى ئەکادیمیاى کوردى  

 

 

 

 

 

ئه‌م بابه‌ته‌ 311 جار خوێندراوه‌ته‌وه‌ دواین نوێكردنه‌وه‌ دوو شەممە, 01 کانونی یەکەم 2014 07:49