Homeهەواڵئەکادیمیاى کوردى ڕێزى لە قەڵەمى دوو زاناى گەورە:" مامۆستا عیزەدین مستەفا ڕەسووڵ " و " مامۆستا کەمال مەزهەر" گرت

ئەکادیمیاى کوردى ڕێزى لە قەڵەمى دوو زاناى گەورە:" مامۆستا عیزەدین مستەفا ڕەسووڵ " و " مامۆستا کەمال مەزهەر" گرت

بڵاوكراوه‌ته‌وه‌ له‌ هه‌واڵ یەک شەممە, 28 کانونی یەکەم 2014 08:28

 

 

 

 


بە لەبەرچاوگرتنى قەڵەم و بەرهەم و خزمەتى دوو زاناى گەورەى کورد، کە ئەندامى کاراى ئەکادیمیاى کوردین، هەر یەکە لە پ.د عیزەدین مستەفا ڕەسووڵ و پ.د.کەمال مەزهەر، لە رۆژى یەکشەممە،ڕێکەوتى 14/12/2014، ئەکادیمیاى کوردى مەراسیمێکى رێزلێنانى بۆ ئەم دوو گەورە زانایە لە ناو تەلارى ئەکادیمیا ڕێکخست.
مەراسیمەکە بە ئامادەبوونى سەرجەم ئەندامانى ئەنجومەنى ئەکادیمیاى کوردى و چەندین مامۆستای زانکۆ و کەسانى رۆشنبیر و نووسەر بەڕێوەچوو.
سەرەتا دکتۆر نورى تاڵەبانى، سەرۆکى ئەکادیمیا لەبارەى ئەو ڕێزڵێنانەوە چەند وشەیەکى پێشکەش کرد و وتى: رێزلێنان بۆتە مەراسیمێکى ساڵانەى ئەکادیمیاى کوردى بۆ ئەو نووسەرانەى خزمەتێکى زۆریان بە وشە و زمانى کوردى کردووە. ئەمرۆش بە شانازییەوە ئەکادیمیا رێز لەم دوو زانا گەورەیەى کورد دەگرێت، کە خزمەتێکى زۆریان بە زمان و ئەدەب و مێژووى کورد کردووە.پاشان بەشێک لە بیرەوەرییەکانى خۆى لەگەڵ هەردووکیان گێڕایەوە. دواتر هەریەکە لە دکتۆر ئازاد ئەحمەد و دکتۆر جەبار قادر و دکتۆر فاروق عومەر سدیق و مامۆستا کەمال غەمبار بیرەوەرى و یادگارییەکانى خۆیان لەگەڵ ئەم دوو نووسەرە گێڕایەوە. لە کۆتاییدا دیارى و خەڵاتى ئەنجومەنى ئەکادیمیا لەلایەن سەرۆکى ئەکادیمیاوە بە هەردوو زاناى گەورەى کورد بەخشرا و پ.د عیزەدین مستەفا ڕەسووڵ بەناوى خۆى و پ.د.کەمال مەزهەر سوپاسى ئەکادیمیا و ئامادەبووانى کرد و کۆتایى بە مەراسیمەکە هێنرا.

عیزەدین مستەفا ڕەسووڵ
پڕۆفایل
ـ ناو: عیزەدین کورى مەلا مستەفاى سەفوەت، کوڕى حاجى مەلا ڕەسووڵى دێلێژەیە.
ـ ساڵى 1934 لە گەڕەکى (دەرگەزێن)ى شارى سلێمانى لە دایک بووە .
ـ ساڵى 1949 بۆتە ئەندامى حیزبى شوعیى عیراق .
ـ ساڵى 1959 خانەى بەرزى مامۆستایانى لە بەغدا تەواو کردووە.
ـ ساڵى 1963 یەکەم گەواهى نامەى دکتۆراى لە باکۆ وەرگرتووە.
ـ ساڵى 1966 بووەتە مامۆستا لە بەشى کوردى کۆلیژى زمان لە زانکۆى بەغدا.
ـ ساڵى 1969 لەگەل چەند نووسەرێکدا یەکێتیى نووسەرانیان دامەزراندووە .
ـ سالى 1967 لەگەڵ مامۆستا ڕووناک مەحموود ساڵح ڕەشەدا ژیانى خێزانى پێک هێناوە ،بەرهەمى ئەم ژیانە سێ منداڵە بەناوەکانى: راز، یار، بادە.
ـ ساڵى 1979 "دکتۆراى ناووک"ى لە مۆسکۆ وەرگرتووە.
ـ ساڵى 1992 بووەتە ئەندامى پەرلەمانى کوردستان تا سالى 2005 .
ـ ساڵى 2009 خەڵاتى (بلە)ى بۆ کەسایەتیى ساڵ لە بوارى ئەدەبدا وەرگرتووە .

د . کەمال مەزهەر:
پڕۆفایل
ـ دکتۆر کەمال مەزهەر ئەحمەد حاجى ڕەسووڵ، لە ناحیەى (ئەغجەلەر)ى سەر بە پارێزگاى کەرکوک، لە ساڵى 1937 لە دایک بووە.
ـ لە ساڵى 1955 زاینى خوێندنى ئامادەیى تەواو کردووە.
ـ ساڵى 1959 کۆلێژى پەروەردەى لە بەغداد تەواو کردووە و بروانامەى خوێندنى بە کەلیۆریوسى لە مێژوودا بە پلەیەکى بەرز بەدەستهێناوە.
ـ ساڵى 1963 یەکەم بروانامەى دکتۆراى وەرگرتووە لە یەکێتى سۆڤیەتى جاران
ـ ساڵى 1969 بڕوانامەى (ناووک) ى لە یەکێتى سۆڤیەت وەرگرتووە.
ـ چەندین کتێبى بە هەردوو زمانى کوردى و عەرەبى هەیە

 

 

 

 

 

 

ئه‌م بابه‌ته‌ 698 جار خوێندراوه‌ته‌وه‌

« نیسان 2019 »
٢ شەم ٣ شەم ٤ شەم ٥ شەم هەیینی شەممە ١ شەم
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

 

 

 

 

 

 

 

Copyright © 2013 Kurdish Academy. All Rights Reserved.