Homeکار و چالاکیکورتەیەک لە چالاکییەکانی ئەکادیمیای کوردی لە ساڵی 2014

کورتەیەک لە چالاکییەکانی ئەکادیمیای کوردی لە ساڵی 2014

بڵاوكراوه‌ته‌وه‌ له‌ کار و چالاکی چوار شەممە, 21 کانونی دووەم 2015 08:08

 

 

 

• د.ئیسماعیل بێشکچى سەردانى ئەکادیمیاى کوردى کرد:
سۆسیۆلۆگ و نووسەرى ناودارى تورک د.ئیسماعیل بێشکچى، پاش نیوەڕۆى ڕۆژى 1/6/2014 سەردانى ئەکادیمیاى کوردى کرد، سەرەتا لەگەڵ د. نوورى تاڵەبانى سەرۆکى ئەکادیمیا کۆبووەوە، پاشان لە هوڵى مەلا مەحموودى بایەزیدى بابەتێکى لەژێر ناوى: (ئازادى ڕامان ، ئازادى چاپەمەنى و ئازادى ئەکادیمى) پێشکەش بە ژمارەێکى زۆر لە مامۆستا و ڕووناکبیران کرد، پاشان لەلایەن سەرۆکى ئەکادیمیاوە خەڵاتێکى شایستەى بەناوى ئەکادیمیاوە پێشکەش کرا.
• پەردە لەسەر پەیکەرى پێنچ شاعیرى مەزنى کورد لابردرا:
ڕۆژى 25/6/2014 و لە مەراسیمێکى تایبەتدا، ،سەرۆکى ئەکادیمیا و چەند ئەندامێکى کارا پەردەیان لەسەر پەیکەرى پێنچ شاعیرى مەزنى کورد: (ئەحمەدى خانى)، (نالى)، (مەولەوى)، (حاجى قادرى کۆیى) و (شێخ ڕەزاى تاڵەبانى) لابرد، بە ئامادەبوونى ژمارەیەک لە بەرپرسى حکوومى و مامۆستاى زانکۆ و ڕووناکبیر و ڕۆشنبیر و ئەدەب دۆستان.

• پێداچوونەوە بە سەدان فۆرم و وشە و دەستەواژەى وەزارەتى دارایی:
لیژنەى زاراوە لە ئەکادیمیاى کوردى، بە سوود وەرگرتن لە کارەکانى ئەو لیژنەى پێشتر لەلایەن وەزارەتى داراییەوە پێکهێنرابوو و بە هاوکاریى کەسانى شارەزا لە بوارى بانک و ژمێریاریى، بە هەموو ئەو فۆرم و وشەو زاراوە و دەستەواژانەدا چووەتەوە، کە لەو وەزارەتە و وەزارەتەکانى داد و شارەوانى وگەشتوگوزار وناوخۆ وئەوقاف و کاروبارى ئایینى و کشتوکاڵ و ئاودێرى و بازرگانى و پیشەسازى و گواستنەوە بەکاریان دێنن و بە نووسراوى ژمارە (574) لە 11/11/2014 دابەشکراون بەسەر وەزارەتە پێوەندیدارەکان.

• چاپکردنى چەندین کتێب لەلایەن لیژنەى چاپ و بڵاوکردنەوە:
سەربارى بارى دارایى ئەکادیمیاى کوردى لەم ساڵەدا، لیژنەى چاپ و بڵاوکردنەوە لە ساڵى 2014 دا چەندین کتێبى هەمە جۆرەى لە بوارەکانى: ئەدەب و مێژوو و جۆگرافیا و فەرهەنگ و زاراوە و زمانەوانى و ڕۆشنبیرى گشتى، بە زمانەکانى کوردى و عەرەبى و ئینگلیزى و فارسى چاپ کردووە، لەگەڵ چەند کتێبێک کە لە زمانى فارسییەوە کراون بە زمانى کوردى.

• کردنەوەى پێشانگاێکى تایبەت بە کتێب فرۆشتن لە ئەکادیمیاى کوردى:
ئەکادیمیاى کوردى لە ڕۆژى 29 /11/2014 و بۆ ماوەى (3) رۆژ، لە کاتژمێرى 10 ى بەیانى تا 4 ى پاش نیوەڕۆ، گەورەترین پێشانگاى کتێب فرۆشتنى بۆ چاپکراوەکانى ئەکادیمیاى کوردى لەناو تەلارى ئەکادیمیا، بە داشکاندنى لەسەدا چل 40% ڕێکخست و خەڵکێکى زۆر لە شار و شارۆچکەکانى کوردستان بەشداریان لەو پێشانگایە کرد.

• رێزلێنان لە دوو ئەندامى کاراى ئەکادیمیاى کوردى:
بە لەبەرچاوگرتنى قەڵەم و بەرهەم و خزمەتى دوو ئەندامى کاراى ئەکادیمیاى کوردى: پ.د عیزەدین مستەفا ڕەسووڵ و پ.د.کەمال مەزهەر، مەراسیمێکى رێزلێنان بۆ ئەو دوو زانایە لە ناو تەلارى ئەکادیمیاى کوردى، بە ئامادەبوونى کۆمەڵێک لە مامۆستاى زانکۆ و ڕووناکبیر و کسایەتى سیاسى ِرێکخرا، کە تێیدا چەندین وتار بەو بۆنەوە پێشکەش کران و لە کۆتاییدا د. نوورى تاڵەبانى سەرۆکى ئەکادیمیا خەڵاتى رێزلێنانى پێشکەش کردن بە ناوى ئەکادیمیاوە.

• کردنەوەى کتێبخانەى ئەکادیمیاى کوردى:
رۆژى 30/12/2014 د. نوورى تاڵەبانى سەرۆکى ئەکادیمیاى کوردى بەشێوەیەکى فەرمى کتێبخانە تازەکەى ئەکادیمیاى کوردى کردەوە، بە بەشدارى چەند بەرپرسێکی حکوومى و ئەندامى پەرلەمانى هەرێم و کۆمەڵێک لە مامۆستایانى زانکۆ و کەسایەتى ڕۆشنبیرى، بەو بۆنەوە چەند کتێبێک لە بەرهەمى ئەکادیمیا پێشکەش بەمیوانەکان کران. شایانى باسە ژمارەى ئەو کتێبانەى لەو کتیبَحانەدا هەیە ئێستا لە بیست هەزار کتێب زیاترە، بە زمانى کوردى و عەرەبى و ئینگلیزى و فارسى و تورکى لاتینى و فەرەنسى. بڕیارە لە ئایندەدا دەرگاى ئەو کتێبخانەیە لەپاش دەوامى فەرمی بکرێتەوە، تا ئەو کەسانەى لە کاتى دەوامى فەرمیدا ناتوانن سەردانى بکەن، ئەوانیش سوود لەو کتێبخانەیە وەربگرن. هەروەها ئەگەر ئەکادیمیا لە ڕووى داراییەوە هاوکاریى بکرێت، جێگا کۆنەکەى کتێبخانەکە بکرێتە مەڵبەندێکى تایبەت بۆ ئەو دەستنووس و دۆکیمەنتانەى لەلایەن ئەکادیمیاوە کۆکراونەتەوە، تا هەموو کەسێک بتوانێ سوودیان لێ وەربگرێت.
کۆڕ و سیمینیارەکان لە ئەکادیمیاى کوردى:
ئەکادیمیای کوردی لە هۆڵی مەلا مەحموودى بایەزیدى لەناو تەلارى ئەکادیمیاى کوردى، زنجیرە کۆڕ و سیمینارێکی بۆ ژمارەیەک لە پسپۆر و مامۆستای زانکۆ بەرێوەبردووە، کە لە خوارەوە بە کورتی ناوى ئەو کۆڕ و سیمینارانە دەخەینە ڕوو:
1. ئەکادیمیاى کوردى پاش نیوەڕۆى رۆژى 12/2/2014، کۆڕێکى بۆ مامۆستا (عەبدولخالق یەعقووبى)، لەژێر ناونیشانى: (بنەماکانى جوانى ناسى لە شیعرى نالى-دا) لە تەلارى ئەکادیمیا ڕێکخست.
2. پاش نیوەڕۆى رۆژى چوارشەممە، ڕێکەوتى 29/10/2014، ئەکادیمیاى کوردى کۆڕێکى بۆ بەڕێز: "د.جەمشید حەیدەرى" لەژێر ناونیشانى: (هەندێ لایەن لە بیرەوەرییەکانم 1949-1991 ) ساز کرد.
3. ئێوارەى رۆژى 12/11/2014 کۆڕێک لە تەلارى ئەکادیمیاى کوردى بۆ بەڕێز (مامۆستا فازیل شەوڕۆ)، لەژێر ناونیشانى: (چاوخشانەوەیەک بە ئاسایشى نەتەوەیى زمانى کوردى ) ساز کرا.
4. لە ڕێکەوتى 10/12/2014، ئەکادیمیاى کوردى کۆڕێکى بۆ بەڕێز (م. عەبدولخالق یەعقووبى) لەژێر ناونیشانى: (وێنەى جوانیى لە ئاوێنەى تەلخى بووندا - خوێندنەوەیەک بۆ کۆمەڵە شیعرى "ئەوین ژەن" ى ئارام ساڵح) ساز کرد.

 

 

 

ئه‌م بابه‌ته‌ 862 جار خوێندراوه‌ته‌وه‌

« تشرینی یەکەم 2019 »
٢ شەم ٣ شەم ٤ شەم ٥ شەم هەیینی شەممە ١ شەم
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

 

 

 

 

 

 

 

Copyright © 2013 Kurdish Academy. All Rights Reserved.